15 avqust 2016-ci il tarixdə REAL-ın Səbail-Nəsimi Məclisinin başqanı Toğrul İsmayılov və Binəqədi Məclisinin başqan müavini Elşən Qasımov Bakı şəhəri Səbail rayonunun ərazisində naməlum şəxslər tərəfindən saxlanılıb və bilinməyən istiqamətə aparılıblar. Toğrul İsmayılov və Elşən Qasımov REAL-ın həbsdə olan sədri İlqar Məmmədovla bağlı çapdan yenicə çıxmış təşviqat materiallarını (flayerləri) götürməyə gedərkən küçədə tutulublar. Onların haraya aparıldığını öyrənməyə çalışsaq da, yerlərini bilmək mümkün olmadı. Səbail və Nərimanov rayon Polis İdarələrinə, Bakı Şəhəri Baş Polis İdarəsinə, Mütəşəkkil Cinayətkarlıqla Mübarizə İdarəsinə, Səbail və Nəsimi rayon məhkəmələrinə baş vursaq da, heç yerdə Toğrul İsmayılovun və Elşən Qasımovun saxlandığı yeri öyrənə bilmədik.
REAL İdarə Heyəti bu halı insan oğurluğu hesab edir və REAL-ın siyasi mövqeyinə və fəaliyyətinə qarşı yönəlmiş növbəti qanunsuz basqı kimi dəyərləndirir. REAL İdarə Heyəti bəyan edir ki, heç bir basqı təşkilatımızı tutduğu yoldan döndərə bilməz. Eyni zamanda, REAL İdarə Heyəti bildirir ki, REAL-ın bütün siyasi risklərini və onlarla bağlı məsuliyyəti ancaq və ancaq İdarə Heyəti daşıyır. REAL İdarə Heyəti bütün üzvlərinin nəzərinə bir daha çatdırır ki, onların heç biri öz şəxsi həyatını, sağlamlığını və azadlığını REAL-a görə qurban verməyə borclu deyil. Üzvlərimiz qanunsuz basqılar və hədələr qarşısında REAL-ın rəhbərliyinə qarşı onlardan tələb olunan hər bir ifadəni verə bilər. REAL İdarə Heyəti üçün REAL üzvlərinin şəxsi təhlükəsizliyi hər zaman yüksək önəm daşıyıb və bundan sonra da daşıyacaq.